«Вифлеемъ - Дом Хлеба»
Выпуск 10 (октябрь 2015)

КАНОН МОЛЕБЕН
Преподобному отцу нашему Ксенефонту,
и преподобней матери нашей Марии,
и чадом их Иоанну и Аркадию

(Память их 26 января по старому стилю, или 8 февраля - по новому стилю;
им молимся о семейном мире и благополучии, а также об обретении потерянных детей и сродников.)

Здесь приводятся устáвные указáния для молéния нескольких человек вместе.

Старший мужчина из них, или лицо, благословлённое свящéнником на ведéние слýжбы, называется в тексте Стáршим.
Псалóмщик - человек, читающий моли́твы.
Певцы́ - те, которые пою́т.
При моли́тве в одинóчку всё читает (поёт) сам молящийся.

Текст, набранный жирным шрифтом, поётся или читается вслух.
Текст, набранный обычным шрифтом, вслух не читается.

В домáшней моли́тве допусти́мо вместо пения моли́тв читать их, вслух или мы́сленно.

Где написано «поклóн», нужно сотвори́ть крéстное знáмение и поклони́ться до пóяса;
если написано «поклóн до земли» - крéстное знáмение и поклóн до земли.
Где написано «Слáва», нужно читать: Слáва Отцý и Сы́ну и Святóму Дýху.
Где написано «И ны́не», нужно читать: И ны́не, и при́сно, и вó веки векóм, ами́нь.

* * * * * * *

Стáрший возглашает, начиная моление: Гóсподи Исýсе Христé, Сы́не Бóжии, поми́луй нáс!
Все отвечают: Ами́нь.
Стáрший: Бóже, ми́лостив бýди мнé грéшному (поклóн).
Создáвыи мя́ Гóсподи, и поми́луй мя́ (поклóн).
Без числá согреши́х, Гóсподи поми́луй и прости́ мя грéшнаго (поклóн).
Достóйно éсть я́ко вои́стину блажи́ти Тя́, Богорóдице: при́сно Блажéнную, и Пренепорóчную, и Мáтерь Бóга нáшего. Честнéйшую Херуви́м, и Слáвнейшую вои́стину Серафи́м, без истлéния Бóга Слóва Рóждьшую, Сýщую Богорóдицу Тя́ величáем (поклóн до земли).
Слáва (поклóн). И ны́не (поклóн). Гóсподи поми́луй (двáжды), Гóсподи благослови́ (поклóн).
Отпýст: Гóсподи Исýсе Христé, Сы́не Бóжии, моли́тв рáди Пречи́стыя Ти́ Мáтере, си́лою Честнáго и Животворя́щаго Крестá, и святы́х Áнгел, Храни́тель нáших, и всéх святы́х, поми́луй и спаси́ нас, я́ко Блáг и Человеколю́бец. (Поклóн без Крéстного знáмения до земли́).
Все: Ами́нь.
И по сéм начáле (прихóдных поклóнах) Стáрший благословля́ется начать слýжбу, тó есть, твори́т ОДИН, БЕЗ ОСТАЛЬНЫ́Х МОЛЯ́ЩИХСЯ, три поклóна с моли́твою втáй (мы́сленно): «Бóже, очи́сти мя грéшнаго и поми́луй мя (поклóн). Создáвыи мя́ Гóсподи, и поми́луй мя́ (поклóн). Без числá согреши́х, Гóсподи прости́ мя (поклóн)», - и глагóлет:
За моли́тв святы́х отéц нáших, Гóсподи Исýсе Христé, Сы́не Бóжии, поми́луй нáс. (Стáрший твори́т поклóн в пóяс, остальные же не творя́т).
Псалóмщик глагóлет крóтким и рáвным глáсом с ти́хостию, и со вся́ким вниманием и со стрáхом Бóжиим во услы́шание всем: Ами́нь.
Святы́и Бóже, Святы́и Крéпкии, Святы́и Безсмéртныи, поми́луй нáс (три́жды, и поклóны три, с Крéстным знáмением).
Слáва, и ны́не. Пресвятáя Трóице, поми́луй нас. Гóсподи, очи́сти грехи́ нáшя. Влады́ко, прости́ беззакóния нáшя. Святы́и, посети́ и исцели́ нéмощи нáшя, И́мене Твоегó рáди.
Гóсподи поми́луй (три́жды). Слáва, и ны́не. Óтче нáш, И́же еси́ нá Небесéх, да святи́тся И́мя Твоé, да прии́дет Цáрствие Твоé, да бýдет вóля Твоя́, яко нá Небеси́ и на земли́, хлéб нáш насýщныи дáждь нáм днéсь, и остáви нáм дóлги нáшя, я́ко же и мы́ оставляя́ем должникóм нáшим, и не введи́ нас во искушéние, но избáви нáс от лукáваго.
Стáрший: Гóсподи Исýсе Христé, Сы́не Бóжии, поми́луй нáс. (Стáрший твори́т поклóн в пóяс, остальные же не творя́т).
Псалóмщик: Ами́нь. Гóсподи поми́луй (12 раз). Слáва, и ны́не. Прии́дите, поклóнимся Царéви нáшему Бóгу (поклóн).
Прии́дите, поклóнимся Христý, Царéви и Бóгу нáшему (поклóн).
Прии́дите, поклóнимся и припадéм к Самомý Гóсподу Исýсу Христý, Царéви и Бóгу нáшему (поклóн).

Псалом 42

Гóсподи, услы́ши моли́тву мою́, внуши́ молéние моé во и́стине Твоéй, услы́ши мя́ в прáвде Твоéй. И не вни́ди в сýд с рабóм Твои́м, я́ко не оправди́тся пред Тобóю вся́к живы́и. Я́ко погнá врáг дýшу мою́, и смири́л éсть в земли́ живóт мóй. Посади́л мя éсть в тéмных, я́ко мéртвыя вéку, и уны́ во мнé дýх мóй, во мнé смути́ся сéрдце моé. Помянýх дни́ дрéвния, поучи́хся во всéх дéлех Твои́х, и в дéлех Рýку Твоéю поучáхся. Воздéх к Тебé рýце мои́, душá моя́, я́ко земля́ безвóдная Тебé. Скóро услы́ши мя Гóсподи, исчезé дýх мóй. Не отврати́ лицá Твоегó от менé, и уподóблюся низходя́щым в рóв. Слы́шану сотвори́ мне заýтра ми́лость Твою́, я́ко на Тя́ уповáх. Скажи́ мне Гóсподи пýть, вóньже пойдý, я́ко к Тебé взя́х дýшу мою́. Изми́ мя от врáг мои́х Гóсподи, к Тебé прибегóх. Научи́ мя твори́ти вóлю Твою́, я́ко Ты́ еси́ Бóг мóй. Дýх Твóй Благи́и настáвит мя нá землю прáву. И́мене Твоегó рáди, Гóсподи живи́ши мя́, прáвдою Твоéю изведéши от печáли дýшу мою́. И ми́лостию Твоéю потреби́ши враги́ моя́, и погуби́ши вся́ стужáющия души́ моéй, я́ко áз рáб Твóй éсмь.
Слáва, и ны́не. Аллилýия, Аллилýия, слáва Тебé Бóже (три́жды, с поклóнами).
Певцы: Гóсподи поми́луй (12 раз). Слáва Отцý и Сы́ну и Святóму Дýху, и ны́не, и при́сно, и вó веки векóм, ами́нь.
Стáрший: Бóг Госпóдь и яви́ся нáм, благословéн Гряды́и вó имя Госпóдне.
Певцы́ пою́т: Бóг Госпóдь и яви́ся нáм, благословéн Гряды́и вó имя Госпóдне.
Стáрший: Исповéдайтеся Гóсподеви я́ко Блáг, я́ко в вéк ми́лость Егó.
Певцы́ пою́т: Бóг Госпóдь и яви́ся нáм, благословéн Гряды́и вó имя Госпóдне.
Стáрший: Обышéдше обыдóша мя́, и и́менем Госпóдним противля́хся и́м.
Певцы́ пою́т: Бóг Госпóдь и яви́ся нáм, благословéн Гряды́и вó имя Госпóдне.
Стáрший: Не умрý, но жи́в бýду и повéм дéла Госпóдня.
Певцы́ пою́т: Бóг Госпóдь и яви́ся нáм, благословéн Гряды́и вó имя Госпóдне.
Стáрший: Кáмень, Егó же небрегóша зи́ждущеи, Сéй бы́сть во главý ýглу, óт Гóспода бы́сть Сéй, и éсть ди́вна во óчию нáшею.
Певцы́ пою́т: Бóг Госпóдь и яви́ся нáм, благословéн Гряды́и вó имя Госпóдне.
Псалóмщик чтéт тропáрь, глас 4. Бóже отéц нáших, творя́и при́сно с нáми по твоемý смотрéнию, не отстáви ми́лости твоея́ от нáс, но тéх моли́твами во смирéнии устрóи живóт нáш.
Слáва, и ны́не, Богорóдичен. Éже óт века утаéнное, и Áнгелом несвéдомое тáиньство, Тобóю Богорóдице, земны́м яви́ся Бóг, в неразмéсне сня́тии воплощáемь, и Крéст вóлею нáс рáди восприи́м, и́м же воскреси́ Первоздáннаго, и спасé от смéрти душя́ нáшя.

Псалом 50

Поми́луй мя Бóже, по вели́цей ми́лости Твоéй, и по мнóжеству щедрóт Твои́х, очи́сти беззакóние моé. Наипáче омы́й мя от беззакóния моегó, и от грехá моегó очи́сти мя. Я́ко беззакóние моé áз знáю, и грéх мóй предо мнóю éсть вы́ну1. Тебé Еди́ному согреши́х, и лукáвое пред Тобóю сотвори́х. Я́ко да оправди́шися в словесéх Свои́х, и победи́ши внегдá суди́ти. Сé бо в беззакóниих зачáт éсмь, и во гресéх роди́ мя мáти моя́. Сé бо и́стину возлюби́л еси́, безвéстная и тáйная премýдрости Твоея́ яви́л ми еси́. Окропи́ши мя иссóпом - и очи́щуся, омы́еши мя - и пáче снéга убелю́ся. Слýху моемý дáси рáдость и весéлие, возрáдуются кóсти смирéнныя. Отврати́ лицé Твоé от грéх мои́х, и вся́ беззакóния моя́ очи́сти. Сéрдце чи́сто сози́жди во мнé Бóже, и Дýх прáв обнови́ во утрóбе моéй. Не отвéрзи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéния Твоегó, и Дýхом Влады́чным утверди́ мя. Научý беззакóнныя путéм Твои́м, и нечестии́вии к Тебé обратя́тся. Избáви мя от крови́й Бóже, Бóже спасéния моегó; возрáдуется язы́к мóй прáвде Твоéй. Гóсподи, устнé мои́ отвéрзеши, и устá моя́ возвестя́т хвалý Твою́. Я́ко áще бы восхотéл жéртвы, дáл бы́х ýбо: всесожжéния не благоволи́ши. Жéртва Бóгу дýх сокрушéн: сéрдце сокрушéно и смирéно Бóг не уничижи́т. Ублажи́, Гóсподи, благоволéнием Твои́м Сиóна, и да сози́ждутся стéны Иеросали́мския. Тогдá благоволи́ши жéртву прáвды, возношéние и всесожегáемая. Тогдá возложáт на олтáрь Твóй тельця́.
Стáрший: Гóсподи Исýсе Христé, Сы́не Бóжии, поми́луй нáс! (Стáрший делает поклóн в пóяс, остальные - нет).
Певцы́ пою́т: Ами́нь.

Канóн, творéние Феóфаново, глáс 2. Пéснь 1, ирмóс. Певцы́ пою́т: Гряди́те лю́дие, поéм пéснь Христý Бóгу, раздéльшему мóре, и провéдшу лю́ди я́же испусти́ из рабóты еги́петския, я́ко прослáвися.
Псалóмщик: Запéв: Преподóбнии отцы́, моли́те Бóга о нaс. (Поклóн.)
Дрéва жи́зни, и рáйскаго вои́стину наслаждéния, премýдрии ны́не восприéмше, и́же вáс восхваля́ющая, моли́теся спасти́ к Человеколю́бцу.
Запéв. В пýть зáповедeй твои́х, шéствуя тéпле твóй рáб Влады́ко, оби́тели дости́же, сугýбым желáнием жи́зни вéчныя приéм.
Слáва. Нóвую сéнь Авраáмову, показáл еси́ свóй дóм всéм; тéмже чю́дне, во Авраaма нéдрех, достóйно и прáведно почи́л еси́.
И ны́не, Богорóдичен. Вéсь в Тя́ всéлься Пренепорóчная, вéсь в мя́ человека вообрази́ся, от Отцá восия́выи, Превéчное Слóво безначáльное.
Стáрший поёт катавáсию: Избáвите от бéд рабы́ своя́, преподóбнии Ксенефóнте, Мáрие, Иоáнне и Аркáдие, я́ко вси́ пó Бозе к вáм прибегáем, вы́ бо мóлите о нáс Христá Бóга нáшего (поклóн).
Певцы́ пою́т: Гóсподи поми́луй (три́жды, с поклóнами).

Пéснь 3, ирмóс. Певцы́ пою́т: На кáмени мя вéры утверди́, разшири́ устá моя́ на враги́ моя́, возвесели́бося дýх мóй воспевáти: нéсть свя́та я́коже Бóг нaш, и нéсть прáведна пáче Тебé Гóсподи.
Псалóмщик: Запéв. Свéтлыми сия́ньми почтéн, светонóсным житиéм украси́ся, дéлание бо восхождéние видéния, вопия́ показáл еси́: Ты́ еси́ Бóг нáш, и нéсть прáведен пáче тебé Гóсподи.
Запéв. Я́ко всéм строи́тель бы́в, всéх попечeние прия́л еси́, трéбующим богáтьство своé подавáя, приéмля любомýдрено, и́нокующих чи́ны óтче преподóбне.
Слáва. Закóнми питaяся Влады́ки, в закóне, и поучéнием и наказáнием Госпóдним, наказaл еси́ своя́ дéти, зовы́и чyдне: Ты́ еси́ Бóг нáш, и нéсть свя́т пáче тебé Гóсподи.
И ны́не, Богорóдичен. Еди́ну дéвствующу по рожеcтвé Мари́ю, святы́х святéйшую, сýщую неискусобрáчную Богорóдицу, прииди́те воспоéм вéрнии зовyще, рáдуися Мáти Чи́стая, рáдуися Влады́чице.
Стáрший поéт катавáсию (пи́сана по первой пéсни).
Певцы́ пою́т: Гóсподи поми́луй (три́жды, с поклóнами).
Псалóмщик чтéт: Слáва, и ны́не. Седáлен. глaс 8. В зáповедех Влады́ки бдя́, подóбными же óбразы óтроки своя́ наказýя, блажeнне Ксенефóнте, и супрýжницу; с ни́ми же Вы́шнее наслéдова Цáрьствие, напáстей вся́ких устáвль обуревáние; тéмже восхваля́ем благочéстно вáс вси́, и любóвию почитáем, и вéрно взывáем: Богонóснии и пребогáтии, моли́те Христá Бóга, грехóв оставлéние даровáти, чтýщим любóвию святýю пáмять вáшю.
Слáва, и ны́не, Богорóдичен. Я́ко Дéву еди́ну в женáх, Тя́ без сéмене рóждьшую Бóга плóтию, вси́ ублажáем рóди человéчестии, Óгнь бо всели́ся в Тя́ Божéственыи, и я́ко Младéнца дои́ши Зижди́теля и Гóспода; тéмже áнгельскии собóр и человéческии рóд, безпрестáни слáвим Пресвятóе Рожествó Твоé, и соглáсно вопиéм ти́: моли́ Христá Бóга, грехóв оставлéние даровáти, воспевáющим достóйно слáву Твою́.

Пéснь 4, ирмóс. Певцы́ пою́т: Услы́шах Гóсподи, слýх Твоегó смотрéния, и прослáвих Тя́, Еди́не Человеколю́бче.
Псалóмщик: Запéв. Спáсшеся от бýри житéйския, в пристáнище благочéстия устреми́стеся, дéти преблажéнныя.
Запéв. Наказáеми рáзуму Божéственому, и человéческому, Бóгови служи́ти извóлисте.
Слáва. Из бéздны преподóбнии мирски́я, избáвльшеся преслáвно, во благи́х Бéздну приидóсте.
И ны́не, Богорóдичен. Избáвлении крóвию, и́же от рéбр излия́нною Сы́на Твоегó, Богомáти, вси́ Тя́ ублажaем.
Стáрший поéт катавáсию (пи́сана по пéрвой пéсни). Певцы́ пою́т: Гóсподи поми́луй (три́жды, с поклóнами).


Пéснь 5, ирмóс. Певцы́ пою́т: Свéта Подáтелю, и векóм Твóрче Гóсподи, вó свете твои́х повелéнии настáви нáс, рáзве бо тебé инóго Бóга не знáем.
Псалóмщик: Запéв. К непáгубней иды́и жи́зни, потщáлся еси́ дости́гнути, свящéнныи Аркáдие грáд, и Грóбу И́стинныя Жи́зни поклóни́лся еси́.
Запéв. Я́ко благолéпно вои́стину, бы́вшее на тебé промышлéние, и чю́дно и преслáвно, окормлéние Божéствено, всéх Влады́ки преблажéнне Аркáдие.
Слáва. О тебé попечéние творя́, И́же нa рукý Симеóню пéрвие Носи́мыи, Божéственаго стáрца, стáрцем тя́ Божéственым Аркáдие нося́, Христóс настaвил éсть.
И ны́не, Богорóдичен. Сы́на Безначáльна и Соприсносýщна Отцý, родилá еси́ пáче естествá, из Тебé воплощéна Пренепорóчная Отрокови́це, тéмже Богорóдицу Чи́стую Тя́ проповéдуем.
Стáрший поéт катавáсию (пи́сана по пéрвой пéсни). Певцы́ пою́т: Гóсподи поми́луй (три́жды, с поклóнами).

Пéснь 6, ирмóс. Певцы́ пою́т: В бéздне грехóвней одержи́м, не изслéдную милосéрдия Твоегó призывáю бéздну, от тли́ Бóже мя возведи́.
Псалóмщик: Запéв. Блажéнную жи́знь желáя, ко и́нокующих притéкл еси́ чи́ну, Живóтное Духновéние, споспéшника Иоáнне творя́.
Запéв. Человекоуби́йцы злóбы умерщвeние, и смертонóсныи я́д оттря́с, к живонóсному грóбу Христóву, Иоáнне притéкл еси́.
Слáва. Иоáннову житию́ поревновáл еси́, и́бо я́коже óн в пусты́ню всели́лся еси́, и чи́сте пóжив Иоáнне, Христóви очищáяся.
И ны́не, Богорóдичен. Нéбо простры́и хотéнием, другóе Нéбо содéла одушевлeнно, Тя́ Богомáти Чи́стая, из Тебé сýщим во тмé восия́л éсть.
Стáрший поéт катавáсию (пи́сана по пéрвой пéсни). Певцы́ пою́т: Гóсподи поми́луй (три́жды, без поклóнов). Слáва Отцý и Сы́ну и Святóму Дýху, и ны́не и при́сно и вó веки векóм!
Псалóмщик: Ами́нь!
Кондaк, глaс 4. Житeйскаго мóря избéгше, Ксенефóнте прáведныи, с супрýжницею честнóю, нá Небесех весели́тася, с чáды, Христá величaюще.
И́кос. Стрáнен пýть, Боголéпно Ксенефóнте шéствовал еси́, и с супрýжницею прия́сте естествó, я́коже бесплóтнии я́ве на земли́ я́вльшеся; тéмже и двéри Небéсныя вáм отверзóшася, и со áнгелы ликýете, я́ко виногрáда бы́вше Госпóдня, Божéствении дéлатели, и с чáды, моли́теся ýбо Христóви, даровáти зарю́ просвещéния, омрачéным нáшим сердьцáм, пáмять вáшю творя́щим светонóсную, Светодáтеля Христá величáюще.

Пéснь 7, ирмóс. Певцы́ пою́т: Богопроти́вно велéние беззакóннующа мучи́теля, высóк плaмень вознеслó éсть, Христóс же простéр Богочести́вым дéтем, хлáд духóвныи, сы́и благословéн и препрослáвлен.
Псалóмщик: Запéв. Умá чистотóю, и́же Богонóсное вáше собрáние зря́, провозвести́; Бóг бо прáведныи, благочéстие вáше Божéствене совокупи́ во еди́но, я́ко щeдр и ми́лостив.
Запéв. (Повторя́ется тóт же стих.)
Слáва. Рéвность благочéстия зря́, желáние приéм, вéру посети́в вáшю Человеколю́бец, всé собрá во еди́ну трапeзу вáс Благодáтель, и препрослaвленыи.
И ны́не, Богорóдичен. Надéжда непосты́дная, надéжда твéрдая, и стенá непоколеби́мая, и покрóв и Помóщница бýди ми́ Всенепорóчная, надéющемуся на Тя́: на Тя́ бо возлагáю Чи́стая, всю́ надéжду спасéния моегó.
Стáрший поéт катавáсию (пи́сана по пéрвой пéсни). Певцы́ пою́т: Гóсподи поми́луй (три́жды, с поклóнами).

Пéснь 8, ирмóс. Певцы́ пою́т: Пéщь óгненна иногдá в Вавилóне, дéйство разделя́ше, Бóжиим велéнием халдéи опаля́ющи, вéрныя же прохлаждáющи пою́ща, благослови́те вся́ дéла Госпóдня Гóспода.
Псалóмщик: Запéв. Пéщь óгнену зелó распаля́ему, разлучéние дрyг óт друга крéпко претерпéсте; утрóбою растерзáеми, и душéю распаля́еми, жáлом естéственым, страдáния мýченик подъя́сте.
Запéв. Свы́ше вaс óблак росодáтельныи, человеколю́бия осени́, в горáх Сиóнских, идéже росá духóвная, ученики́ просвети́ зовyщия, благослови́те вся́ дéла Госпóдня Гóспода.
Слáва. Ми́лостива нáм и благопремéнна бы́ти, Благодáтеля моли́те отцы́ пребогáтии, и́же вáшю торжествýющим свящéнную пáмять, и естествóм совокýпленым, и сóбранным благодáтию.
И ны́не, Богорóдичен. Единорóднаго Сы́на и Бóга Слóва, Первовéчнаго из Безначáльна Отцá, неизречéнно восия́вша, твáри пéрвенца бы́вша родилá еси́, тéмже Тя́ Богомáти, вси́ язы́цы слáвим.
Стáрший поéт катавáсию (пи́сана по пéрвой пéсни). Певцы́ пою́т: Гóсподи поми́луй (три́жды, с поклóнами).

Пéснь 9, ирмóс. Певцы́ пою́т: Безначáльна Роди́теля Сы́н Бóг и Госпóдь, воплóщься от Деви́цы нaм яви́ся, омрачéнныя просвети́ти, и собрáти расточéнныя, тéм всехвáльную Богорóдицу величáем.
Псалóмщик: Запéв (с поклóном). На рáмех взéмше Христóв крéст, вои́стину шéствовасте стезéю воздержáния, всю́ добродéтель совершáюще, дóндеже сáмую вои́стину, нестарéемую Жи́знь прия́сте, вéчно рaдующеся.
Запéв. Обладáвше плотьски́м мудровaнием, духóвное богáтьство сокры́сте, благодáть исцелéнием приéмше, от Истóчника даровáнии, к Немý же ны́не пришéдше, вéчно почивáете.
Слáва. Победи́вше преподóбнии, ковáрства змии́нaя, при кончи́не страдáнием нарекóстеся, прáвде венéц от Христá приéмше достóйно, Егó же ны́не моли́те, спасти́ душя́ нáшя.
И ны́не, Богорóдичен. Без мáтере пéрвие, по пéрвому рождéнию, нáс рáди Воплощéнна, раждáеши без отцá, во двою́ познавáема естествý, Божéственем и человéчестем, и си́ми уверя́ема дéйствы, Бóгоневéсто.
Стáрший поéт катавáсию (пи́сана по пéрвой пéсни). Певцы́ пою́т: Гóсподи поми́луй (три́жды, с поклóнами).

Посéм певцы́ пою́т задостóйник на глас 8: Влады́чице, приими́ моли́тву рáб Свои́х, и избáви нáс от вся́кия нýжды и печáли. Ты́ еси́ Богорóдице, Орýжие нáше и Стенá, Ты́ еси́ Застýпнице, и к Тебé прибегáем, Тя́ и ны́не на моли́тву призывáем, да избáвиши ны́ от врáг нáших. Возвели́чим Тя́ вси́ Пренепорóчную Мáтерь Христá Бóга нáшего, Ю́же осени́ Дýх Пресвяты́и (поклóн до земли́).
(Сéй задостóйник поéтся всегда, крóме вели́ких (двунадеся́тых) прáздников Христóвых и Богорóдичных, и́бо тогда, вмéсто сегó задостóйника, поéтся ирмóс девя́той пéсни прáздничнаго канóна - от дня прáздника и до отдáния егó.)

Псалóмщик: Святы́и Бóже, Святы́и Крéпкии, Святы́и Безсмéртныи, поми́луй нас (три́жды, и поклóны три, с Крéстным знáмением).
Слáва. И ны́не. Пресвятáя Трóице, поми́луй нас. Гóсподи, очи́сти грехи́ нáшя. Влады́ко, прости́ беззакóния нáшя. Святы́и, посети́ и исцели́ нéмощи нáшя, И́мене Твоегó рáди.
Гóсподи поми́луй (три́жды). Слáва. И ны́не.
Óтче нáш, И́же еси́ нá Небесех, да святи́тся И́мя Твоé, да прии́дет Цáрьствие Твоé, да бýдет вóля Твоя́, я́ко нá Небеси и на земли́, хлéб нáш насýщныи дáждь нáм днéсь, и остáви нáм дóлги нáшя, я́ко же и мы́ оставля́ем должникóм нáшим, и не введи́ нáс во искушéние, но избáви нáс от лукáваго.
Стáрший: Гóсподи Исýсе Христé, Сы́не Бóжии, поми́луй нáс. (Стáршии твори́т поклóн в пояс, остальны́е же не творя́т).
Псалóмщик: Ами́нь. И чтéт тропáрь, глас 4: Бóже отéц нáших, творя́и при́сно с нáми по твоемý смотрéнию, не отстáви ми́лости твоея́ от нáс, но тéх моли́твами во смирeнии устрóи живóт нáш.
Слáва. Кондaк, глaс тóй же. Житeйскаго мóря избéгше, Ксенефóнте прáведныи, с супрýжницею честнóю, нá Небесех весели́тася, с чáды, Христá величáюще.
И ны́не, Богорóдичен, глáс тóй же. Éже óт века утаéнное, и Áнгелом несвéдомое тáиньство, Тобóю Богорóдице, земны́м яви́ся Бóг, в неразмéсне сня́тии воплощáемь, и Крéст вóлею нáс рáди восприи́м, и́м же воскреси́ Первоздáннаго, и спасé от смéрти душя́ нáшя.
Певцы́ пою́т: Гóсподи поми́луй (40 раз, с тремя́ поклóнами в начáле). Слáва Отцý и Сы́ну и Святóму Дýху, и ны́не, и при́сно, и вó веки векóм, ами́нь.
Честнéйшую херуви́м и слáвнейшую вои́стину серафи́м, без истлéния Бóга Слóва рóждьшую, сýщую Богорóдицу Тя́ величáем
(поклóн). Слáва (поклóн). И ны́не (поклóн). Гóсподи поми́луй (двáжды), Гóсподи благослови́ (поклóн).

Стáрший говори́т отпýст: Гóсподи Исýсе Христé Сы́не Бóжии, моли́тв рáди Пречи́стыя Ти́ Мáтере, и преподóбных отéц нáших Ксенефóнта, Иоáнна и Аркáдия, и преподóбныя мáтере нáшея Мáрии, и всéх святы́х, поми́луй и спаси́ нас, я́ко Блáг и Человеколю́бец.
Певцы́ пою́т: Ами́нь. Гóсподи поми́луй (три́жды).

И твори́м обычные исходные поклóны:
Стáрший глаголет: Бóже, ми́лостив бýди мнé грéшному (поклóн). Создáвыи мя́ Гóсподи, и поми́луй мя́ (поклóн). Без числá согреши́х, Гóсподи поми́луй и прости́ мя́ грéшнаго (поклóн).
Достóйно éсть я́ко вои́стину блажи́ти Тя́, Богорóдице: при́сно Блажéнную, и Пренепорóчную, и Мáтерь Бóга нáшего. Честнéйшую Херуви́м, и Слáвнейшую вои́стину Серафи́м, без истлéния Бóга Слóва Рóждьшую, Сýщую Богорóдицу Тя́ величáем (поклóн до земли́).
Слáва (поклóн). И ны́не (поклóн). Гóсподи поми́луй (двáжды), Гóсподи благослови́ (поклóн).
Гóсподи Исýсе Христé, Сы́не Бóжии, моли́тв рáди Пречи́стыя Ти́ Мáтере, си́лою Честнáго и Животворя́щаго Крестá, и святы́х Áнгел, Храни́тель нáших, и всéх святы́х, поми́луй и спаси́ нáс, я́ко Блáг и Человеколю́бец. (Поклóн без Крéстного знáмения до земли́).
Все: Ами́нь.
Стáрший: Бóже, ми́лостив бýди мнé грéшному (поклóн). Создáвыи мя́ Гóсподи, и поми́луй мя (поклóн). Без числá согреши́х, Гóсподи поми́луй и прости́ мя́ грéшнаго (поклóн).
Гóсподи Исýсе Христé, Сы́не Бóжии, поми́луй нáс!
Все: Ами́нь.

Стáрший поздравля́ет всех с совершéнием молéбна. И твори́м расхóд.


* * * * * * *


Примечания:
1 Всегдá (слав.)

 

 


ПОИСК В ИНТЕРНЕТ
 
 

 
 
 
   
 
 
Flag Counter
 
Top.Mail.Ru Яндекс.Метрика Рассылка сайта 'Чёрный монах'
Студия ARST Project